بعض النصائح لطلاب السنة #الرابعة على وجه الخصوص بكليات الطب البشري
بعض النصائح لطلاب السنة #الرابعة على وجه الخصوص بكليات الطب البشري :
بعد ما خرجت من الامتحان الوطني، كنت حابب شوف -بالتحديد- أي زميل من السنة الرابعة حتى قلو جملة وحدة بس :D : "السنة #الرابعة هي السنة #الأهم"
الأهم... لأن هي السنة هي البداية الحقيقية والعملية للطب... إذا نجحت بهي السنة، فنجاحك رح يكون سهل ومضمون في السنوات القادمة، وفي مسيرتك كطبيب بشكل عام...
وما بقصد بكلمة النجاح "الترفع ع الستين"! معنى النجاح أعمق وأكبر وأهم من هيك...
شو ما كان مستواك سابقاً، وشو ما كان معدلك، وشو ما كانت ذخيرتك العلمية خلال السنوات الثلاثة السابقة، إنت قادر على المعاوضة، وعلى البداية من جديد في السنة الرابعة، إذا نويت على ذلك، وهذا بدو تعب حقيقي....
السنة الرابعة كانت على دورنا صعبة جداً، وكثيفة جداً، ومتعبة جداً، لكنها ممتعة بكل المقاييس...
لأنها كانت اللقاء الاول مع الوجه الحقيقي للطب....ولللقاءات الأولى دائماً خصوصيتها وجمالها وصعوبتها.
الطب يا زملاء متل طنجرة كبيرة :D وانت عليك خلال كل هي السنوات تعبئة هي الطنجرة، بالمعلومات....
ويلي بيعبي طنجرتو أكتر شي ، رح يكون ناجح أكتر شي...
الانسان يلي عندو أكبر قاعدة بيانات رح يكون خبير أكتر من غيرو، وقادر على التحليل والاستنتاج أكثر من غيرو...
- في السنة #الرابعة و #الخامسة لا تدرس بشكل تجاري، لا تدرس من أجل النجاح والعلامات...هي الأشياء رح تكون نتائج حتمية، إذا عملت كل ما يجب أن تعمله.
ادرس لتتعلم كيف تكون قادر على علاج الآخرين....ادرس جميع المحاضرات، حتى تتعرف على جميع الأمراض...
في السنوات الثلاثة الاولى قد يبرّر حذف بعض المحاضرات، لكن في السنة الرابعة والخامسة أي محاضرة محذوفة، هي مخاطرة، لانك يمكن تكون حذفت مرض مهم قد تسئل عليه في مقابلة أو في الامتحان الوطني، أو حتى تسأل عليه من أحد جيرانك...
- في السنة الرابعة يمكن تشعر أحياناً أنك غرقان في بعض المواد نتيجة كثافة المعلومات، هذا الشعور طبيعي في البداية...طبيعي جداً إنك تغرق في البداية، وانت عم تتعلم السباحة.
وتذكر إنو الدراسة الثانية أفضل من الدراسة الاولى، والدراسة الثالثة أفضل من الثانية...
الاحترافية في التكرار...
- الدماغ لا ينسى شيء، و كل المواد المهمة يلي عم تدرسها اليوم رح تعيد دراستها في السنة السادسة.... والمواد يلي بتكون قوي فيها من السنة الرابعة رح تدرسها برياحة واحترافية أكتر في السنة السادسة، والمواد يلي رح تكون فيها ضعيف بالسنة الرابعة، رح تعاني منها بالسنة السادسة...
ولا بأس من فكرة جديدة، وهي أنو أثناء دراستك لكل مادة، ممكن أن تجهز ملخصك الخاص لهي المادة، وتحضرو من هلا للسنة السادسة.
- الستاجات مهمة جداً، أنا ما عرفت قيمة الستاجات إلا في الامتحان الوطني، لما واجهت بعض الأسئلة يلي تذكرت اجاباتها -ليس من محاضرة أو كتاب- وإنما من الستاجات فقط، على لسان دكتور في درس صباحي أو في جولة على المرضى..
- الخطة الجديدة حتماً رح تساهم بالنتيجة برفع المستوى العلمي للدفعة بشكل كبير، لأنكن بالنتيجة رح تدرسو المواد أكثر من مرة، ورح يكون مستواكن العلمي أفضل من مستوى الدفعات يلي تخرجت قبلكن،وأكبر من مستوى بقية الجامعات... و هذا مكسب كبير...
في النهاية أكيد الدراسة ليست عمل سهل... برأيي الدراسة عمل شاق...وشاق جداً
لكن أسلوب الاحتراف في أي شيء هو في العمل المتواصل والمستمر يوم بعد يوم
وتذكر أنو ما رح تصير طبيب في ليلة وضحاها...
دراسة الطب تستغرق سنين، وإن لم تتمتع بأخلاق وصبر السلحفاة لن تنجح في سعيك...
كل التوفيق والنجاح الكن :)
د.خالـد عـوّاد 🌸
داخليه عصبية - دمشق .
0 تعليقات على موضوع : بعض النصائح لطلاب السنة #الرابعة على وجه الخصوص بكليات الطب البشري
الأبتساماتأخفاء الأبتسامات